منتديات أبودليق
أخي الحبـيب ... الزائر الكريم ... حبابك عشرة بلا كشرة تفضـل بـدخـول دارك فعز الله مقدارك ولك من إدارة المنتدى ومن كل أهل أبودليق الطيبين التحية والتقدير فأنت من تساهم برفعة أبودليق والإعلاء من شأنها نتمنى لك وقتا سعـيداً بين أهلك وأخوانك ــ تفضل بالدخول ــ فلا تنسى نطق الشهادتين والصلاة على النبي :
(( لا إله إلا الله محمد رسول الله ))
(اللهم صلي على سيدنا محمد وعلى آله وصحبه وسلم)

رأس المال الحقيقي ـ للروائي طارق اللبيب

استعرض الموضوع السابق استعرض الموضوع التالي اذهب الى الأسفل

رأس المال الحقيقي ـ للروائي طارق اللبيب

مُساهمة من طرف أحمد حيدوب في الأربعاء 6 مايو 2015 - 9:10




راس المال الحقيقي
الحلقة الأولى

في مدينة القضارف حصلت بداية قصتنا .. وبالاصح في قريه قريبة من القضارف .. تعتبر تابعة للولاية .. في القرية دي في اسرة من الاسر السودانية العريقة .. ذات الاصالة نحن الليلة حنكون مسلطين عليهم الضو .وهم الليلة ضيوف جلستنا .. والقصة كلها تدور عن احمد ود عوض .. وهو الابن الوحيد لعمك عوض .. وعمك عوض طبيعة عمله الزراعة بالطبع .. السنة دي المرة التالتة احمد يسقط في امتحان الشهادة السودانية .والغريب في الامر انو احمد ما مهمل وزول بقرا ما شاء الله وبذاكر كل الدروس وصداقاته محدوده .والبشوف قرايتو ومذاكرته يقول الزول ده بجي اول السودان .بس اول ما يمتحن وتظهر النتايج .. يلقوه راسب والقصة دي بقت مسار حديث الناس ومصدر سخريه وبعض الناس بقو تستهتروا مع عمك عوض وعوض راجل احمق ومقفول في المرة الاخيره دي لما احمد رسب ابوه وصل درجة من الزعل والغضب حكايه ما محتمله لانه لسع مانسى سخرية الناس السنه الفاتت تاني احمد سقط للمرة التالت حكايه ما محتمله طوالي ناداهو يا أحمد .. يا زفت .. تعال ..
جاهو سريع . قاليه : نعم يابا ..
قال له .: اببو يشرطك كان بتعرف الاحترام كان نجحت
قال ليهو والله يا ابوي انا دخلت الامتحان وانا متاكد اني بنجح بس ما عارف البحصل شنو .
قال ليهو : ده الكلام البتقولو لي كل سنه على كل حال. انا والله الليله ح أعاقبك عقاب تندم طول حياتك وتكره اليوم الوراك درب المدرسه وتندم انك انت احمد ود عوض. ياخي الناس البسوى والمايسوه يتكلم فوقنا بي سببك عليك الله انا قصرت فيك بشنو ؟ وريني .. مسوي ليك اوضه براك . اكلك يجيك جوه شرابك يجيك جوه كل سنة رسوم ومصاريف ومسلتزمات ليه ؟ ليه؟ يا احمد تنتقم مني انتقام زي ده ياخي حرام عليك رسوب تلاته مرات .؟
واحمد طبعا مدنقر وما رد على ابوهو وحس بانو قلبو مقفول في فرن والعبره سدت حلقه؟ وزعلان انه خذل ابوهو واكتر حاجه مزعلاهو خيبة الامل التي اصابت الوالد .
قال ليهو امشي غور من قدامي انا دمي فاير بقوم اضربك بي مصيبه اجيب أجلك .
احمد قال ليهو يا ابوي انا قبلان اي عقاب تفرضو على وانا بستحق بس انت ماتزعل .
قال ليهو بقول ليك طير امشي اوضتك انا هسي بجيك هناك واوريك بعمل فيك شنو؟
احمد طوالي مشى الغرفة (قطيه طبعاً ^_^). منتظر العقاب يارب في شنو؟ وح يعمل ليه شنو عمك عوض زعلان زعل عجيب ولافي في البيت زي المجنون كايس ليهو لي حاجه بفتش ما عارف عايز يعمل شنو
الله يستر الله يستر ..


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في الأربعاء 6 مايو 2015 - 9:20




الحلقة الثانية

طبعا انتو متابعين معاي لمن عمك عوض ابو احمد كان زعلان وبفتش ليهو لي حاجة .. دخل المخزن طلع ليهو شنطة حديد قديمة .. وجابها وجا لي احمد في غرفته ..
وقال ليهو : شيل الشنطه دي لم فيها هدومك واختاني انت زول فاشل وما بتنفع معاي امشي شوف شغلتك امشي عيش روحك انا ماعندي ليك طريقة كفاية صرفت عليك دم قلبي بدون فائده. ماداير اشوفك في البيت ده تاني .
احمد قال ليهو يا ابوي خليني معاك .خليني اشتغل ليك خدام اوعدك ح اشتغل في السوق واعمل اي حاجه بس اكون قاعد معاكم .
ابوهو قال ليهو : لا ابدا انا ما محتاج لشغلك انا لو شفتك قدامي ما برحمك .انت موش بقيت راجل ؟ شيل حيلك وامشي شوف ارزاقك وين .انا ما دايرك معاي وما تناقشني في الموضوع ده تاني .
طبعا احمد مشى شكا لي امه الكلام وقال ليها بتقدري تتكلمي معاهو .
امو قالت ليهو انت عارف ابوك راسو اقوى من الصبه .. هسي لو مشيت اتكلمت معاهو بعمل لي موضوع انا كمان .. لكن انت اسمع كلامه وامش بعد فترة احتمال يهدأ وانت تعال.
ابوهو بره سمع الكلام قال ليها اسمعي .. تاني لو عتب البيت ده انا اكون حمار زيه .. طبعا احمد كدا انقطع من قلبه اي امل .. ومشى يلملم في هدومه شي فوق حمار الحديد بتاع الهدوم .وشي من الدولاب. وشي في سبت الهدوم الوسخانه ودفس الشنطة وقفلها وشالها وشال مصاريف مواصلات من امه وطلع
المهم ركب وهو ما عارف ماشي وين .. ركب الحافلات الماشة مدني ومشى منطقة اسمها المدينه عرب . وهي مدينة متوسطه يكثر فيها شجر النيم تقع في الناحية الغربية لي وسط الجزيرة قعد في ضل نيمة وخاتي شنطته ومحتار .. وجواهو احاسيس بالاحباط والحزن العجيب جدا .. قعد محتار حيرة شديده خلاص وما عارف يعمل شنو باقي القروش المعاهو بسيط.
المهم في النيم ده عينو وقعت في - اسكافي (نقلتي) الزول البصلح الشباشب .
مشى عليهو سلم عليهو وقعد معاهو .. النقلتي قال ليهو ان شاء الله خير يا ولدي عندك حاجه قال ليهو مضايق وداير لي زول احكي ليهو وما لقيت زول غيرك لو مشيت حكيت لزول من التجار ديل بقولو عايز اشحد .. لكن طبعا ما ممكن اشحد منك انت لانك زيي والحال من بعضه ..
الاسكافي ابتسم وقال ليهو طيب احكي ..
احمد بدا يحكي ليهو من امتحانه الاول وفشله تلاته مرات في الأمتحان والاسكافي يسمع بعدم اهتمام اول ما بدا يحكي ليهو عن تصرفات ابوهو الاسكافي رمى الشبشب من يدو وقعد متمحن يسمع في احمد لغاية ما خلص قصته.
قال ليهو بالمناسبة ابوك ما عنده فهم يا ولدي الذرية نعمه والزول ما بضيعها كدا بالطريقة دي والمشكلة يا ولدي الزول ما بعرف قيمة الحاجة الا لمن يفقدها والزول البحس احساس العاقر بعرف تمام قيمة الجنى .انا يا ولدي متزوج لي اكتر من تلاتين سنة ما انجبت وشوقي في الدنيا انو ربنا يقسم كان ولد كان بت والله يا ولدي انا بساهر الليل كله ببكي بشوق الذريه انا كان عندي ولد زيك ما بفرط فيهو يا ولدي انا مشتهي احساس الابوه والاسكافي سرح بعيد كدا لمن عيونو رقرقن ..
قال ليهو انا اسف ياعمي ما كنت عارف ..
قال ليهو ولا يهمك يا ولدي ترا انت عرفت انا ما عندي ولد رايك شنو تقعد معاي في البيت قال ليهو يا عمي انا ما كلمتك عشان تعطف علي او تتكرم علي انا راجل وبقدر ادبر اموري لكن كلمتك لاني حاسي باني بقيت مصدر الم وعذاب لي ابوي وضميري مؤنبني شديد.
قال ليهو يا ولدي انت ما عملت كدا بي ارادتك .ان شاء الله الامور تتسهل وابوك يرضى منك ..
اها قلت شنو حتقعد معاي؟؟
قال ليهو انا مستحيل اقعد في بيت بعد بيت ابوي وهسي ابوي لو سمع اني قاعد مع ناس ما برضى
لالا يا عمي انا اسف انا ما بقدر ..
المهم الاسكافي مصر من جواهو عايز احمد يقعد معاهو لانو ح يستفيد من خدماته واحمد رافض بس الاسكافي فكر في فكره جواهو ..


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 9:33




الحلقة الثالثة

طبعا عمكم الاسكافي اسمو الفاضل .
فكر كدا قال الزول ده دواخلو نقية وزول حنين انا لازم احاصرو بي الحاجه دي
قال ليهو اسمع يا ولدي انا زوجتي متأثره شديد بي عدم الذريه
وقبل فتره قالت لي جيب لينا ولد أو بت من الملجأ عشان نربيها وانا رفضت
لكن هسي لو مشيت معاي بتعيد لينا الحياة والفرحه في بيتنا
وتبقى لينا ولدنا وتعوض المراة المحرومه دي احساس الامومة ولو لي فتره معينة
اها رايك شنو؟
احمد قال ليهو طيب ابوي لو سمع باني قاعد معاكم ما برضى مني
هو دايرني اشيل حيلي واكون نفسي براي
قال ليهو ابوك ما بسمع والبكلمه منو؟ وهنا ما في زول بعرفك اساساً
اها قلت شنو؟
احمد سكت مسافة وقال ليهو : علي بركة الله يا عم
بالاختصار احمد العصر شال شنطته وطوالي مشى مع الاسكافي للبيت
والاسكافي كورك لي مرتو من جم خشم الباب يا عشة يا عشة ..
البشاااااره جبنا ليك ولد ..
عشة جات طالعة ويديها فيهم صابون شكلها كانت بتغسل
امرأة متوسطة العمر تظهر عليها ملامح الاحزان
حتى رموش عينيها محتوته من كثرة البكاء
من شافت احمد اتبسمت كانها تعرفه من زمن ..
يا زول رحبت بي احمد وفرحت شديد وخلت غسيلها
وجات قعدت وقالت احكو لي القصة شنو؟
وزوجها قعد يحكي ليها برضو بكت .
وقالت ليهو ده من حظنا نحن نحس بي طعم الذرية بعد العمر ده .
احمد خصصو ليهو غرفة وخت فيها شنطته واخد راحته
وقعد مع الجماعة وحس بي الفه غريبة
المهم كل يوم بقى يخدم المراة في البيت ويمشي يخدم الراجل الاسكافي وبدا يتعلم حرفة الاسكافي ..
بعد كم يوم مشى محل بتاع اتصالات وضرب لابوهو ..
وابوهو شخت فيهو ورفض يتكلم معاهو ورفض يديهو امه يسلم عليها .. ومشى قلبو مكسور .
المهم بقى مع عم الفاضل الاسكافي يشيل ليهو الحاجات ..
ويجيب ليهو الخيوط والمقصات والابار ..
وكل الادوات والمسلزمات لحياكة الحذيه ..
وبقى مراقب الشغل لغاية ما اتعلم الشغله .
وهم حبوهو حب شديد .
وبقى اسكافي مجيد في فترة بتاعة عشرين يوم وضب الشغل وبقى خطير
وبقى عم الهادي يطلع مشاوير وهو يقعد يسد خدمه ويشغل شغل متقن جدا
ومعاملته مع الناس غاية في الروعة والطيبه .
اها يوم اتفقو انو يعملو فرشتين في السوق
فرشه لي عم الفاضل وفرشه لي احمد .
وفعلا اشتروا الادوات والفرشة وكل مايلزم النقاله وبدا الشغل على بركة الله
واحمد بقى اسكافي في السوق .
والناس كلهم عرفوه وبقى مشهور جدا في فترة شهرين عمل زباين واصحاب
ومعاملته مع الناس غريبة طيب لدرجه
ياخي لدرجة انو لما يكون فاضي وجا زول فايت وحس حذاهو محتاج لشغل بقول ليهو تعال
اصلحه ليك مجان وكتير بتعامل كدا ..
طبعا هنا الناس حبوهو وبقى محله مزدحم والاحذية عنده كتيرة
بالطبع كل القروش البكسبها بتمشي لعم الفاضل وزوجته في مصاريف البيت وكدا
يعني معتبر نفسه ولدهم بالفعل
اها في حاجه حصلت .. طبعا الناس الكانو زباين الفاضل كلهم بقو يجو لاحمد
لانه شغله متقن اكتر من استاذه ومعاملته اطيب .
وعم الفاضل ناسو قلو وبقى طول اليوم قاعد فارغ ويشرب في القهوة
ومتضايق من عدم الشغل .
اها يوم في جماعة جابو احذيه عشان يصلحوها واحمد كان مزحوم
قال ليهم رايكم شنو اوديها لعمي يصلحها ليكم
قالو ليهو لا .. اما انت او ما عايزين ..
وعم الفاضل كان بشاهد في المشهد وسامع الحوار ..
المهم الراجل اتضايق .. واحمد لاحظ للضيق الحصل عليه ..
وبتعامل مع احمد عادي لكن احمد حاسي وشايف الحاصل .
طبعا ناس انقياء بالطريقة دي لازم تحصل مواجهة
ونشوف الحلقة الجاية البحصل شنو؟؟


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 9:38




الحلقة الرابعة

احمد قام الصباح يوم قبل عم الفاضل يمشي السوق وقال ليهو يا عمي انا عندي طلب وياريت ما تحرجني وانا والله عايز اكلمك ومستحي منك وخايف ترفض لي .
عم الفاضل قال ليه في شنو يا احمد اطلب موية عيوني تهون عليك .
احمد حس بالعبرة سدت حلقو بس اشجع وقال ليهو : يا عم انا عايز اسافر
قال ليهو مسافر وين انت يادوب الشغل فتح معاك وماشي كويس .
قال ليهو والله بس اتضايقت من البلد وعايز اغير جو بس طبعا صعبان علي افارقك انت
والوالده . بس ياريت تديني الاذن انا امشي قال . ليهو بس انا شايف انك انت هنا مرتاح والامور ماشة معاك كويس .
قال ليهو بصراحه يا عمي انا حسيت انو قعادي هنا ممكن يأثر على شغلك وانا ما ممكن الناس يبعدو منك بسببي . وبصراحه انا حسيت انك متضايق مني .
وانا زعلان من روحي شديد جدا لاني ضايقت انسان أواني واكرمني.
عم الفاضل سكت ساي وكت عرف انو احمد حاسي بيهو وكاشف الغيرة الحصلت عليه .
المهم بعد الحاح شديد وممانعة ومراوغه من عم الفاضل اذن ليهو يمشي
بس احمد ودعه وقال ليهو يا عم الفاضل انت اعتبرتني ولدك انا ممكن احتاج لك في اي لحظه
بتوعدني انك تساعدني لمن احتاج ليك وانا بوعدك احترم ابوتك وكرمك ما دمت حي .
احمد سافر لمنطفة تاني بعيده من المدينة عرب قرية بس قرية عامرة ومتحضرة وفيها سوق عامر وبرضو فتش لقا ليهو بيت اجره وطوالي مشى على السوق فتاح يا عليم رزاق يا كريم .
اها السوق ده فيهو اتنين اسكافيين اول حاجه احمد مما خت خرجه وادواته
وقبل ما يفرش مشى لاسكافي الاول وسلم عليه واتعرف عليه وقال ليه انا جاي كايس الرزق وانتو اهل السوق قبالي ان ما اديتوني النية ربنا ما بوفقني . الزول اتبسط منه وقال ليهو ربنا يفتح عليك اشتغل يا زول بالنيه وقال نفس الكلام للاسكافي التاني واذنو ليهو وادوهو النية وبدا .
وبنفس الطريقة ابتسامته العريقة ومعاملته العجيبه واخلاقه الملائكية ياخي الزول والله بخجل الناس عديل كدا . في اسبوعين سحر المنطقة كلها بمعاملته واخلاقه العالية ومحبته للناس واحساسه بالاخرين .
والزباين كتروا عليهو والجماعة الاتنين ديك زباينهم بدوا يقلو وكلها شهرين بس وتاني مافي زول بقى يمشي عليهم واحمد يشتغل من الصباح للمغرب.
اها المغيرة والمكايدات بدت وبدوا يعملو معاهو قصص ويحكوا عليه الحكاوي .
والكلام ما مؤثر فيه ولا شغال بالموضوع كل ما يسمع ليهو كلام بسكت ساي ويتبسم ويهز راسه. وهو ما عارف الكلام ده طالع من الجماعة النقلتية الاتنين ديل ولا حاسي انو اثر على شغلهم . لانهم كانو عندهم رواكيب من الخيش وهو كان بره في الضل يعني حتى ما شايف زباينهم اها وكت لقو الكلام ما مؤثر باي حاجة الزول شغال في شغلته رسلو ليهو واحد قال ليهو فلان وفلان قالوا ليك انت من جيت هنا نحن شغلنا قلا وزباينا طاروا يا اما تختا البلد دي او نحن حنضرك ضرر تتمنى معاهو الموت ..
اتخيلو الزول العامل مسكين ده عمل شنو تحت ظرف هذا التهديد


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 9:43




الحلقة الخامسة

ردة فعل احمد اول ما سمع الرسالة المرسولة من النقلتية الاتنين قاليهو قوليهم حاضر إن شاء الله من الليلة ما بضايقكم نهائي .. وبراحة لملم عدتو ومشى البيت وقعدي فكر
قال في ضميرو كلام كتير قال : يا جماعة الناس ديل مالهم هسي الارزاق بيد الله. ورزق زول ما بياكلو زول سبحان الله ..
طيب عشان انا ما اسبب ليهم ضيق واكون زول مكروه . حأفرش واشتغل قدام بيتي هنا في الحله . اساسا الرزق من الله ولو مكتوب لي رزق بجيني في شارعي ده ,
وفعلا عمل ليهو رويكيبه صغيره كدي في ضل حيطته قريب الباب وفرش وبدا يشتغل
اها طبعا في الايام الاولى ماف زول جايب ليهو خبر وشويه شويه الناس بدو يعرفوه
وبرضو بي نفس الطريقه كسب الناس وودهم بي التعامل الراقي جدا والاخلاق
طالت الايام وكل يوم احمد ماشي في زياده وعنده اصحاب بجو يتونسوا معاهو ..
والرجال وحريم الحلة بتكيفو ليه وحس انو ارتاح في الحلة دي شديد اكتر من المدينه عرب الفيها عمك الفاضل.
في يوم من ذات الايام وهو شغال في شغلته جاهو شافع كدا عمره زي عشرة سنة قال ليهو: اديني الشبشب بتاعي ..
قال ليهو شبشب شنو يا ولد ؟
الشافع قال ليهو شبشبي اديتك ليهو الصباح تصلحه لي ..
قال ليهو ابدا انت ما جيتني هنا ..
الشافع قاليه : انا جبتو ليك انت كذاب انت عايز تسرق شبشبي.
بعد شويه جات امو واخوه الاكبر واختة ماشين مع بعض .
ويهرجو : انت يا بتاع النعلات وينو الشبشب حق الولد اداك ليهو الصباح
الام سمعته ليك كلام فارغ شديد .
وذلته ذله عجيبة.
وهو بس بقول ليهم يا جماعة والله الولد ما شفته الا هسي .
لكن اقول ليكم حاجه .. تعالو العصر افتش احتمال اكون نسيت .
وهو متأكد انو ما جاهو ..
المهم مشو منه وقالو ليهو العصر بنجيك ..
هو طوالي مشى السوق اشترى جزمه بنفس مقاس رجل الولد
طبعا قبيل بس عايز لي كريعات الشافع حفيان طوالي عرف مقاسو
ده شغله وكدا هههه
مشى اشترى جزمة من النوع الجيد ..
لمن جو العصر قال ليهم انا غرمت ليكم الشبشب ..
اها الجزمة دي كيف رضيان يا ولد؟
انت اسمك منو؟
قال ليه اسمي عاطف
الام قالت ليهو بس الجزمة دي غالية بمناسبة الشبشب
قال ليها خلاص انا جبتها ليهو بي نيه
ولا يهمك يا حاجه ..
ومشو طوالي شالو الجزمه .
بكرة الصباح في شافع من الجيران جا لي اهل الولد الاسمو عاطف ده
وقال ليهم هاكم الشبشب بتاع عاطف نساهو عندنا امس الصباح.
طبعا هم اتفاجئوا شديد وراسهم اتملا ودخلو في ضفورهم
من الذله الزلوها لي احمد وهو ساكت بكل صبر واخلاق
كمان في النهاية يشتري جزمة للولد
طبعا ما عرفو يعملو شنو من الخجله الحسو بيها
المهم اتشجعوا ومشوا ليه وقالو ليهو نحن جايين وما عارفين نقول شنو
بس لانه انت انسان نادر الوجود في الدنيا دي يمكن تفهمنا
وحكو ليهو قعد يضحك وقال والله لكن عاطف عملها ..
ده من حظه لقا ليهو جزمه جديده
لكن يا عاطف الكذب حرام تاني ما تكذب.
والناس ديل بقو اصحابه وخصوصا المراة الكبيرة دي بقت تجيهو صباح ومساء وتجيب ليهو الاكل ومن الصباح تدق ليهو الباب يلقاها جابت ليهو الشاي المهم معاملته معاهم اتحسنت لكن حصلت ليهو مشكلة مع الناس ديل غيرت مسيرتو كلوكلو ولخبطت اوضاعه ..


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 9:50




الحلقة السادسة

الجماعة ديل اهل عاطف الصغير ..
بقو اكتر ناس متواصلين مع ابوحميد صاحبنا ده .
وبجوهو كتير هو من طبعه ما بمشي لبيوت الناس كتير .
عاطف عنده اختو اسمها عواطف 19 سنه زوله مكتمله الكمال لله .
اها بقت الليل والنهار تجي ماشة بي شارع احمد عشان تشوفو وتسلم عليهو وتتبسم وتسأله من احواله ..
وكترة الجية واحمد بدا يلاحظ لي حركاتها ظاهرة طبعا البنات الواحده لمن تحب ما بتقدر تخفي مشاعرها بظهر فوق عويناتها ..
اها احمد طبعا جادي جدا في الحاجات دي وكل مرة بحاول يطنش الموضوع ويقول احتمال انا بتخيل ساي .. لا لا مستحيل تكون بتحبني ديل ما عارفين اصلي من فصلي ..
وتكررت المشاوير حتى ناس الشارع لاحظوا للبت مشاويرا كترت بالشارع ده لامن سوتله ديداب . وبدو اصحابه يتكلمو معاهو .. بعد كدي هو خلاص فهم وقرر يتكلم معاها ويوقفها في حدها ..
يلا خلاها ليك يوم جات وخالقه ليها موضوع بتاع شبشب مقطوع
اظنها قطعته براها عشان تجي تشوف ابوحميد ..
طوالي احمد بدا يتكلم معاها
قال ليها يا عواطف انا عندي شورة وما قادر اقولها لزول .
رايك شنو احكي ليك امكن تديني راي لاني انا محتار .
انا يا عواطف بحب لي بنت من حلتنا .
وما بنوم الليل من شدة شوقي ليها
وبريدها اكتر من روحي ومن نحن اطفال ..
وهي بتحبني لدرجة الجنون .
وهسي طبعا زي ما حكيت ليك حصلت لي مشكلة
مع ابوي وما عارف هسي الحاصل عليها شنو عايز اضرب ليها اقول ليها انتظريني وما عارف ظروفي كيف وخايف احبسها معاي لمستقبل مجهول .
ولو قلت ليها اتزوجي ما تنتظريني انا بمووووت بموت عديل ..
وهي زاتها بتموت اصلو بينا حب ما بتتصوريهو ..
(هو بتكلم وشغال بخيط في الحذاء)
اها لمن رفع راسو بعد خلص كلامو .. .
لقا ليك البيت دموعها على خدودها
التف التف تتناثر على خدودها كحبات اللآلئ
ولمن قعد يعاين ليها انقدت بالبكاء وهو خاف
وقعد يتلفت في الشارع ما يشوفها زول ..
وهو بقول ليها : عواطف عواطف بتبكي ليه ؟
الله الله .. اسكتي ساي نحن في الشارع .
وطوالي البت ختت طرف توبها فوق خشمها
ومشت البيت وخلت الشبب في يدو ..
هو طبعا قاصد يقول الكلام ده ليها ويحكي ليها هذه القصة المكذوبة.
ومشت البيت وكلمت ناس البيت بكل الحاصل
امها قالت ليها انا عرفت من يوم مشينا ليهو في قصة
شبشب عاطف انتي بقيتي ما طبيعية
ماشة وين ماشة ناس سعديه جاية من وين جاية من ناس سعديه
مع انو ناس خالتك سعديه عندهم شارع اقرب من الشارع البجي فايت قدام احمد ده
المهم ناس البيت قالو ليها نحن
ماعندنا مانع انتي بس اقنعيهو هو لو قبل نحن ما عايزين زول احسن منه احمد ده زول نادر اها هي اصرت بكرة الصباح تمشي ليهو
وفعلا مشت ليهو
وقالت ليهو يا احمد انا بريدك وما بتمنى
زول في الدنيا دي غيرك وريني انا قرارك البقولو لي
بتوقف عليهو حياتي من موتي
يا احمد انا بسألك سؤال انا عايزاك انت عايزني ولا لا ؟
وجاوبني وهسي وكانت منفعله شديد وشكلها
ما طبيعي وبترتعش تتكلم
وبتككرر ليهو قول لي انت عايزني وللا لا .. ؟


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 9:57




الحلقة السابعة

قال ليها يا عواطف انتي انسانه جميله والف من يتمناك.
بس انتي ما تكلمي زول الا انا اديك الاوكي.
انا ان شاء الله بعد يومين بسافر اشاور اهلي
واكلم الانسانه الانا مرتبط بيها
واقول ليها تتزوج وكدا والكلام البقولوه لي والديني انا بمشي عليهو
هو طبعا ناوي يهرب من البلد .
اها عواطف شكلها ارتاحت للكلام ووافقت عليه.
ومشت كلمت امها سراً وامها كلمت ابوها واخوانها.
والكلام بقى حبيس البيت وكل البيت فرحانين بالقصة دي
واحمد خايف الخوف قاطع قلبه.
وخايف البت تكلم اهلها ويعتبروا انه بلعب ببنات الحلة وتبقى ليهو سمعة سيئة
وعواطف ما كلمته انها ادت اهلها خبر .. ولاحظو انه مافي زول عارف احمد اهله وين . طيب هو بجهز في حاله بعد يومين ..
اليوم ده بالليل كان نايم وفي عز النوم صحى بصوت بت بتتكلم معاهو ..
صحى من النوم لقاها بت جميلة وظاهر عليها بت ناس بس ما ياها عواطف ..
لابسة ملابس شفافة شديد يعني ملابس نوم ..
المهم خاف شديد وبقى يقول اعوذ بالله من الشيطان الرجيم انتي انس ولا جن
قالت ليهو انت عوير انا مرتك يا غبي ..
في زول بخاف من زوجته؟؟
طبعا كده خوفو زاد لمن شافها بتتكلم اول ما جات تمسكه جرى على الباب وقال ليها دقيقة يا زوجتي العزيزة انا ماشي الحمام وجاييك ممكن؟
قالت ليهو خلاص امشي سريع انا منتظراك ..
طلع طوالي وقفل عليها باب الغرفة وطلع من البيت وقفل باب الحوش بالجنزير
ومشى طوالي الكلام ده زي واحد نص اتنين صباحا مشى المسجد دق باب الامام . الامام عنده سكن في نفس المسجد جاهو طالع برة راجل اسمه عمك الهادي
(ده الزول الاسمه اتلخبط لي مع الفاضل هههه ) المهم عم الهادي امام المسجد راجل صالح في الخمسينات وزول ظريف ..
قال ليهو احمد؟ مالك يازول جاي زي الوقت ده الفجر لسه ما اذن
قال ليهو عارف بس حاصلة لي مشكلة .
وحكا ليهو الحصل .. شيخ الهادي قال ليهو هسي هي وين البيت قاليهو مقفولة
في البيت انا خفتها تطلع بي حالتها دي يلم فيها ود حرام ما بخاف الله
واحتمال تكون عيانة ومعذورة المعهم انت ارح معاي .
عمك الهادي مشى معاهو طوالي .
ولما شيخ الهادي عايز يدخل عشان يشوفها قال ليهو ما ينفع يا شيخنا البت شبه عاريه اصبر تصبح الواطه ونسترها او نذيع في المسجد لو في زول ضايعة منه بت
عمك الهادي قال ليهو خيرا ما عملت .
لكن بالجد حتحصل ليك مشكلة كبيرة واحتمال اهلها ما يتفهمو قصة قفلتها في البيت دي . ويعملو ليك سيم وجيم .
هنا طبعا احمد سرح سرحة طويلة وانو قصة السفرية والهروب ح تفشل
ومخه بقى يودي ويجيب
قال لي يا الهادي
يا شيخنا عشان كدا انا جبتك تكون شاهد انا زول نضيف ..
قال ليهو بس انا جبتني بعد ما قفلتها ..
قال ليهو بس انت انتظر معاي لغاية الصباح الصباح ربنا بحلها
انا ربنا عالم بي
دقو بابا الجيران شالو كرسيين وقعدوا قدام الباب
بتونسو ومستغربين في الحاصل والبت مقفولة جوه
وما معروف الصباح يحصل شنو؟
إن شاء الله خير .. لكن بالجد رايكم في ابو حميد ده شنو؟


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 10:03




الحلقة الثامنة

طبعا عمك الهادي واحمد قاعدين
بعد مشو الصبح وجو . في ناس جو
ماشين بالشارع ظاهر عليهم الانزعاج راجلين ومراة لابسة سفنجة ومعاهم ولد شاب طوالي عمك الهادي بادرهم بالسؤال :
إن شاء الله خير يا الدرديري ؟
مالكم الحاصل شنو؟
الراجل قال ليهو والله عندنا بت عيانة شوية عندها حالة نفسية واصبحنا الصباح لقيناها مافي عمك الهادي قال ليهم احمدو ربكم بتكم في الحفظ والصون
خشي ياوليه استري البت وطلعيها من جوة
والمراة خشت ..
عمك الدرديري سالهم قاليهم الدخلها البيت ده شنو ؟
موش ده البيت بتاع النقلتي ده .
عمك الهادي قال ليهو نعم بس البت خشت عليهو بالليل وهو قفل الباب عليها من برة وجاني في المسجد.
عمك شكر احمد شكر شديد وقال
ليهو الود انا انا بعرفو يا عم الهادي .
وهو محل ثقة والموضوع عدى على خير الحمد لله
احمد اطمئن الحمد لله وبقى يفكر في السفر من جديد
العصرية طوالي مشى لي عمك الهادي الراجل صاحبو شديد
قاليو يا عم الهادي انا عايز اسافر من البلد دي وما عايز زول يعرف انا ماش وين؟
شيخ الهادي قاليهو كدا انا بشك فيك
مافي زول بتصرف كدا الا زول هارب
من الناس او سارق ليك قروش ..
قال ليهو ابدا يا عم الهادي انا فعلا هارب بس ما سارق
قال ليهم طيب احكي لي
حكى ليهو الحاصل لانه بيثق في عم الهادي وعم الهادي فعلا راجل محل ثقة
المهم وراهو قال ليهم المكان البمشي ليه بتصل عليك وبوريك بس انت تعدني ما تقول لزول
قال ليه على بركة الله واحمد الدغش
قام ركب الباصات وسافر على وين
على منطقة في شمال الجزيرة قريب ولاية الخرطوم
لاحظ انها دي المنطقة التالتة يمشي ليها ..
وهنا برضو اجر بيت ومشى السوق بس من
حظو في المرة دي السوق كان كاشف ومافيهو اي نقلته الزول استلم المكان براهو وبق مرتاح جدا للاوضاع
وي هسع قريب الحداشر شهر واحمد بعيد من امه وابوهو
بس فهم امور في الحياة في بلده ما كان حيعرفها
وبقى شغال كويس وما عنده اي عوجه.
لكن تعالو نرجع بالمشهد للحلة بتاعة
ناس عمك الهادي وتطورات الاحداث هناك
عواطف اكتشفت انه احمد ما سافر اهله
وعم الهادي قال ليهم احمد سافر لمكان ما معروف
واحسن ما تنتظروه وخلو البت تشوف مستقبلها وخلو الزول في حالو .
اول ما عواطف عرفت المعلومة دي سكتت تلاتة يوم لا أكل ولا شراب
ولا بتتكلم ولا بتبكي ولا زعلان ولا فرحانة بس جماد قاعد
نادو ليها شيخ الهادي قعد اتكلم معاها وقرا ليها
ولا حياة لمن تنادي واهلها اصرروا يسفروها الخرطوم للدكتور
المهم بي اختصار عواطف دي عيت عيا عديل ..
عندهم خالها اخو امها في الخرطوم سافروا عشان يقابلو بيها الدكتور
لكن طبعا الدواء محال لا دواء الا في ابو حميد
وابو حميد هجا الله يجيب العواقب سليمة


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 10:08




الحلقة التاسعة

طبعا احمد بقى شغله ماش ميه الميه ..
والاوضاع اتصلحت .
واجر ليهو دكان وبقى يجيب احذيه جديدة بالجملة ..
ويبيعها يعني صاحبنا النقلتي اتطور .
يازول بعد تلاتة شهور اشترى ليهو قطعة وبدا يسدد في حقها. بالاقساط
في حاجة سرية كدا عايزة اقولا ..
احمد لمن يكون قاعد براهو بذكر عواطف كتير
وكل مرة بفكر انو يرجع لي بلدها ويخطبها لكن تاني بخاف ويتراجع
ويقول مستحيل يدوها لي زول بصلح النعلات
طوالي يغير رايو وينسى الموضوع وهو ما عارف انو الناس عايزنه
والبت عيانة بي ريدو .. عليك شوف الحكاية دي ..
المهم طالت الايام البت عواطف هناك ما زلت بتتلقى العلاج في الخرطوم ..
يوم من ذات الايام .
في تاجر من تجار الاحذية جا السوق وقابل احمد وقعد اتونس معاهو
وشاوره في موضوع ..
قال ليهو انا سمعت بي شرفك وامانتك وعايز اتعامل معاك
في شغل معين .
انا عندي مصنع في الخرطوم بتاع احذيه تجيني هناك تشيل الكمية العايزها وتسدد في الوقت البريحك .
واحمد وافق على الموضوع والقصة بقت ساااااالكه
مشى ليهو مرتين في المرة التالتة الراجل قال ليهو
يا ابوحميد انت زول عندك خبرة ومهارة في صناعة الاحذيه واختيار الخامات
انا عايز امسكك شغل في المصنع .
قفل دكانك وابقى معاي رايك شنو؟
احمد وافق واشتغل مع الراجل في المصنع في بحري
وطبعا اول ما دخل سيد المصنع اسمه زروق
اصر انو يعمله رئيس العمال
بس احمد ما وافق وقال ليهو العمال ما بقبلو.
يقولو الولد ده يجي في اول يوم يبقى رئيسنا .
انت بس خليها لي قدام هم براهم بعملوني رئيس
شوف الزول ده واثق في اخلاقه كيف.
وفعلا اشتغل من ضمن العمال لكن الزول ده معاملته مختلفة لزملاهو
بيخدمهم زي كانهم ابواته . يجيب ليهم الاكل ويجيب ليهم الشاي
ويغسل ليهم ملابسهم . وطبعا كلهم اكبر منه سنا
يساعدهم في اشغالهم البتخصهم في المصنع بعد ما يخلص الشغل البخصو
ولو شاف واحد منهم اتاخر بقول ليهو امشي البيت انا بشتغل ليك
يبدأ الشغل قبل الناس وينتهي من الشغل بعد الناس
والمصنع في الشهر الاول ارباحه زادت 40%
لانه الشغل اتضاعف واعمامك بقو شغالين بي جدية خجل من احمد
وبعد شعر عملو اجتماع وقالو عايزين نخلي احمد رئيسنا
لانه ممكن يطلع لينا حقوقنا عشان زروق بتكيف ليهو
وفعلا بقى احمد رئيس العمال في مصنع احذية مشهور ببحري
وتاني يوم بعد بقى رئيس العمال عمل حاجة ما ممكن تخطر على بال
ولا يفكر فيها الا انسان زي احمد .


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 10:47




الحلقة العاشرة

اول ما احمد ثبت نفسه وبقى رئيس ..
فكر في عمك الفاضل الراجل العلمه صنعة النقلتيه زاتها .
ومشا سافر ليهو (خميس وجمعة) وحنسو قال ليهو انا عايزك تشتغل معاي بأجر كافي وافي .. ولو ما عايز تعال انا اديك احذية جديدة تبيعها وتجيب القروش وتاني تشيل. قاليهو انا ما عندي دكان . اجر ليهو دكان في نص السوق . وساقو معاهو ورفع ليهو بضاعة من المصنع بسعر خاص جدا بعد مشاورة مع صاحب العمل .
وعمك الفاضل طبعا ماكل في خاطره من الحركة بتاعة الحسد العملها ليهو وخجلان من روحو.
وسبحان الله احمد بيخدم في عمي الفاضل بكل طيبة نيه والحكاية الحصلت ديك ولاهو متذكرها بس كل المتذكره انو الفاضل في يوم الايام لماهو وعلمه الصنعة وحاسس انو عليهو حقوق كبيرة .
عمي الفاضل سافر بالبضاعة وامورو مشت كويس . دي الحاجة .
الموضوع التاني والمهم طبعا المصنع بقى يبيع بيع كتير جدا وشغل مضاعف شديد والزباين كترو ..
اها يوم من الايام احمد عمل اجتماع مع العمال وقال ليهم انتو الماهية مكفياكم ؟
قالو ليهو لا .
قال ليهم رايكم شنو نزيد ساعة في زمن العمل ونزيد المرتب .
في النهاية الساعة ما بتعمل حاجة يعني انتو بدل الساعة 8 صباحا تعالو المصنع الساعة 7 والمرتب يزيد 20% طبعا العمال فرحوا فرح شديد. وقالو ليهو بس سعادة المدير ما بقبل بالكلام ده
قال ليهم انتو ما تشيلو هم انا بكلمو. بكرة طوالي عمل اجتماع مع المدير
وراهو حسابات بنسب معينة .
وقال ليهو نحن الاقبال علينا من تجار الجملة بقى كبير وعندنا ناس من تجار سعد قشرة وسوق ليبيا وغيره بقو اصدقاءنا ومتعهدين ما يشترو من غيرنا
وبقينا ما بنقدر نغطى طلبات الزباين .
ففي الحالة دي بكون عندنا خيارين .
يا اما نجيب عمالة جديده ودي فيها .. ميزات سالبة .
دايما العامل الجديد بحتاج فترة عشان يتعود على الشغل
تانيا بيجد صعوبة مع بقية العاملين في الفترة الاولى
تالتا نسبة المصروفات بتكون كبيرة في المواهي ..
ــ الخيار التاني نحن نزيد ساعات العمل ونزيد نسبة في مواهي العمال الحاليين ..
ودي فيها مميزات موجبة
اولا تزداد ثقة العمال في المصنع والادارة
ويزداد التعلق والحب ويحسو بانو نحن عايزين نساعدهم
تانيا زيادة العمل ساعه بدينا ارباح بنسبة 13%
واجور العمال بتاخد1.7% من الارباح الشهرية ..
وحتزيد نسبة 20% بتكون بالتقريب 2%
وبي كدا بتكون الارباح المجنية للمصنع حكاية مذهلة
وبقى يضرب ليهو في الحسابات .
قال ليهو ياولد انت كيف بتسقط في الامتحان بتاع الشهاده طيب ؟؟
الكلام الانت قلته حساباته مية المية
وانا موافق وفعلا من تاني يوم زادت ساعات العمل وزادت الماهية
والمدير تكفل بحافز والعمال مبسوطين وشغالين بنفس .
والارباح متضاعفة ومرت كم شهر كدا الامور ماشة زي الساعة
بس يوم من الايام الحكاية انساطت بطريقة غريبة
وزروق دعا العمال لاجتماع وطلع احمد بره اتكلم معاهم كتير ..
احمد حس فعلا انه في مشكلة ..
بعد المدير خلص من العمال ناداهو جوة .
بس ما عارف المشكلة شنو؟


ودعتكم الله ،،، بس عايزين الناس تتفاعل مع القصة

إلى اللقاء في الحلقة القادمة ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: رأس المال الحقيقي ـ للروائي طارق اللبيب

مُساهمة من طرف أحمد حيدوب في السبت 9 مايو 2015 - 10:48




الحلقة الحادية عشر
الأخيـــــــــــــــــــــــــــــــــرة

يلا لمن احمد دخل جوه على المدير كان متوتر جدا ..
واكتر حاجة خايف انه يكون غلط في حاجه مع المدير الطيب ده وهو ما جايب خبر ..
المهم قبل المدير ما يبدا يتكلم معاهو جاهو تلفون رفع السماعة ..
واحمد طبعا ما سامع المتصل بس بسمع في زروق بقول كدا ..
عليكم السلام ورحمة الله وبركاته ..
.......................... ــــــ النقط دي كلام المتصل
كيف حالك واحوالك ان اشاء الله اصبحت طيب ..
.......................... ــــــ
الحمد لله في امن وامان وكلنا مية المية ..
.......................... ــــــ
احمد تمام التمام وكل يوم ماشي احسن من امس وهسي ح نقرر الموضوع الاتفقنا عليه امس ..
.......................... ــــــ
حاضر ..
.......................... ــــــ
حاضر ..
وقفل التلفون .. احمد طبعا مستغرب ده منو المتصل والبتكلم عن احمد وبسأل عن اخباره ..
طوالي بادر وسأل زروق وقال ليهو ده منو الاتصل عليك وبسألك مني .؟؟
قال ليهو ح تعرف كل حاجة بس انت اصبر خلينا نعمل الاجتماع ..
قال ليه اتفضل ..
وبدا الاجتماع ..
زروق قال : طبعا يا احمد انت ربنا وفقك بي جدك واجتهادك واخلاقك وطيبتك وتعاملك مع الزباين والعمال والمصنع حقق ارباح عشرة سنين ما حققها ..
وانا افتتحت مصنع جديد قبل يومين في امدرمان
وعايز اخليك تمسك المصنع ده بالنسبة عشان انا ما بقدر اتابع الشغل في محلين ..
احمد ابدا ما مصدق وعيونو رقرقن من الفرحه ..
فقام سأل زروق قال ليهو ده منو الاتصل عليك ..
قال ليهو ده ابوي ..
قال ليهو ابوك بعرفني من وين؟
قال ليهو ابوي صاحبك وصديقك ..
قال ليهو احكي لي .. ياخ واله حيرتني ..
قال ليهو طيب احكي ليك :
انا اتصل علي ابوي اللهو .. . عمك الهادي امام المسجد
ووصاني عليك وانا جيتك عشان التوصية دي ولقيتك فعلا نعم الاخ والابن والاخلاق
وابوي لمن شاف التقدم والارباح قال اشغلك بالنسبة انت منك الشغل وانا مني الخام ..
احمد طبعا دمع واتعجب من طيبة الامام المتواضع والشيخ الفاضل
امام المسجد ابو زروق الهادي ود عمر .
طوالي احمد اتصل علي عم الهادي وشكره وسأله من صحته ومن ناس عواطف
وقال ليهو كويسين بس انت اشتغل في شغلك
انا بتواصل معاك ..
المهم استمر الرجل الخلوق احمد بالنسبة وجد جدية مبالغ فيها ياخي النسبة البقت تجي
لزروق من الارباح قدر ارباحو الزمان ..
واحمد امورو مشت تمام واشترى قطعة وفي تلات شهور بنى بيته في حي راقي ..
وفي النهاية استلم المصنع براهو وبقى يدفع الايجار بس
في يوم منذات الايام ..
اتصل عليهو عمك الهادي وقال ليهو انا عايز اجيك
وفعلا جاهو ..
وقال ليهو انت عايز عواطف وللا غيرت رايك منها؟؟
قال ليهو والله ياعم الهادي هسي ما عارف اخبارها احتمال تكون اتزوجت
وانت ما عايز تحكي لي ..
قام الهادي حكى ليهو انها عيت بسببو ولغاية هسي ما كويسة
وبتتعالج ليها اكتر من سنة
وهسي انا جيتك تمشي معاي ليهم احتمال البت لو شافتك تتحسن
واحمد اتاثر شديد من القصة بتاعة عواطف وع طول مشى معاهو ليهم في حي النزهة في

الخرطوم في بيت خالها
ومن ما دخل البيت وقابل خالها وجات امها سلمت عليه
عواطف كانت جوة سمعت صوته قعدت تبكي
وهي مابكت ليها سنة و8 شهور
المهم بدت تتكلم وتسأل امها واهلها ده منو الجاكم ؟؟
صحي ده احمد الجا ؟؟
ناس البيت فرحو شديد . وكان حدث مهرجاني ..
وقالو ليها ده احمد جا يخطبك .. .
باختصار البقت بقت كويسسة واحمد سافر لابوهو ولقاهو رضيان .. وسال زروق من راس مال احمد قال ليهو راس مالو كان الاخلاق والتعامل ..
وجاب اهلو وجو للعرس وكدا تمت ^_^


ودعتكم الله ،،،

إلى اللقاء ،،،،






avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى