منتديات أبودليق
أخي الحبـيب ... الزائر الكريم ... حبابك عشرة بلا كشرة تفضـل بـدخـول دارك فعز الله مقدارك ولك من إدارة المنتدى ومن كل أهل أبودليق الطيبين التحية والتقدير فأنت من تساهم برفعة أبودليق والإعلاء من شأنها نتمنى لك وقتا سعـيداً بين أهلك وأخوانك ــ تفضل بالدخول ــ فلا تنسى نطق الشهادتين والصلاة على النبي :
(( لا إله إلا الله محمد رسول الله ))
(اللهم صلي على سيدنا محمد وعلى آله وصحبه وسلم)

مختارات من حكايات الخالة شامة

استعرض الموضوع السابق استعرض الموضوع التالي اذهب الى الأسفل

مختارات من حكايات الخالة شامة

مُساهمة من طرف الخزين ود نصر في الخميس 24 ديسمبر 2015 - 3:45

خالتكم شامة دي يا أهلي ناس أبو دليق الكرام من أهلكم الشايقية ساكنه في قرية قريب مروي .. إن شاء الله شويه شويه حتعرفو لهجة أهلكم الشايقية و تستمتعو بطريقة كلامن الدارجي ...


[size=32]- في مرور شامة الصباحي اليومي قابلت في طريقها نادية بت أمونة و التي كانت تقف خلف باب بيتها . فبادرتها شامة :

* كيف حالك آنادية أريتك طيبي .

* حباب خالتي شامة تعالي لاجوة أشربي لِك شاي .

* مره تاني .. هسع ماشي على فاطني بت علي نحضر معاها الكرامة مسواها غدي في الخلوة ... تبارك الله عيني باردي الدخان شايل في كِرعيكي بلا الجداد المحمر .

* مافي زولن جابلي وجع الكرعين غيرك آ خالتي شامة .

* براكي جبتي الوجع لرقبتك عللي ما مغربت لفحتي شملتك و ولعتي حفرتك . ما قاع يسوا يوماتي كدي .. أصبري لي بجي يوم أوصيكي يا بنيتي .

* يجازي محنك آ خالتي شامة خلاس باكر تعالي أفطري معاي يوسف من الصباح شايل كريمي . النبي آ خالتي شامة لا تزعلي مني أنا صاحبة ستنا بتك .. الرسول هي كيف حاله .

* طيبي الحمد لله قاعدي بعافته مع راجله و بناته في بورسودان . خلاس ما دام قلتي صاحبة ستنا بجيك باكر .
[/size]

__________________________________




[size=32]- لبت شامة دعوة نادية للفطور بعد مدة طويلة لم تزر فيها نادية أو أمها حيث كانت تعتبرهم ناسا مسيخين و رافعين نخرتن منذ أن رقد زوجها المستشفى قبل عام و لم يزرنه .

* أقعدي بهني آخالتي شامة المحل دا كيف بارد و سمح . اللجيب الفطور و أجيكي .. قراصة ببامية خدره مخسوس عشانك عارفاكي بتريديها .

* ما قصرتي يا بنيتي ... أها أقعدي بجنبي هني الناكل و أكلمك .

* سمح أها قولي و صاتك و كلامك كلو لا تنسي شي .

* يا بنيتي الظاهر عليكي إنتي و راجلك ماكن مقصرين و دايرين الجنا .

* أيي آ خالتي شاحدي الله ليل و نهار يديني بنيي ول وليد .

* نان مو كدي تعقلي كرعيكي لامن يغلبك المشي .

* ههههههه يجازي محنك آ خالتي شامة .. لالا و حات الله بس يوم كدي العنقريب إتكسر و إنتجيت على مخروقتي ...

* نان مي يا .... شن قلت لك ... الجنا دا بيجي بالمهلة و الروقة لا تجرو ورا شديد .

* عاد نسوي شنو آخالتي .

* أول شي راجلك قعدلو يجي خمس سنين مع مرتو اللولانيي ناظرة المدرسة و ما ولد منها .. و هي كان عندها ولدين من راجله المات في الديش ... لكن إستغفر الله يبقى هي كانت ماها دايري تاني جنا باقي كانت متفلهمي و تغياني . و إنتي هسع دي سنتك التاني .

* الرسول هو طلقه مالو آ خالتي شامة .

* إنتي ما سعلتي ؟

* لالا آبقدر بخافو يزعل .. من اليوم الاول قالي حياتي مع الناظرة لا تجيبيلي طريقه الفات مات .

* و الله يا بتي طوالي كانو متكاجرين و هي طول اليوم في المدرسة و و كت تجي البيت تلقيها تقري في شفعه و مرات تلقيها مدغمري ول تهرج معا .... فشان كدي دخلتي عليهن كانت قليلي . و في يوم سمعتو يقول لها أنا ماني تلميذ عندك لامن ترفعي حسك فوقي . هي بالصح كانت نافشي ريشه فشان هي ناظرة و هو تربال ساكت .... لكن يوسف عيني باردي قلبو حار ما بيسكت لها .. بعد طلقه بشهر كدي جاني و قال لي دايرك تشوفي لي بت حلال هديي و رضيي و مسيكيني ست بيت و حسبتلو تلاتي إنتي ماكي فيهن .

* ليه يا خالتي شامة .

* فشان أمك دي رافعي نخرته علي الحريم كلهن و ما جات شافت راجلي و كت كان راقد في الاستبالي ... قسما بالله مش كان بقت أخت نايب الوالي كان بقت أخت حسن البشير أنا ماني فاضي في واحد فيهن .
دحين يا بنيتي البتسوي فيو دا و كلام الفقرا دا ما بينفع .

* فقرا شنو آ خالتي شامة ؟

* مافي شيتن بيفوتني يا نادية يا بتي .. ما تتابعي أمك المطرطشة دي .. شايفاها قاع تمشي بيت ناس التكروري و كمان يوم ساقتك معاها .

* يعلم الله أنا مشيتلو فد مرة .

* مالك بتمشي ماكي عارفي يوسف كرهتو في الدنيا يشوف خلقة التكروري ؟

* هو بالصح مالو بيكرهو كدي ؟

* يبقى ما نسى حكاية التكروري الزمان مع بت رابحة بت الجزار .

* الرسول تقوليها لي .

* الزمن داك حريم كتار كانن يسوقن بناتن للتكروري يكتب لهن فشان يعرسوهن بسرع .. يوم كدي العصر دخلت عند ناس التكروري بلا أسمع لك الجوطة و حس بت كبيري تسرخ .. أصلو التكروري وكت يجي يكتب بيدخل وآحدي وآحدي .. أها الظاهر دخل البت .. بعد شويي البت بقت تسرخ يمه ألحقيني .. الام دفرت الباب و دخلت في الساعة ديك أنا جيت و دخلت معاها طوالي .. أشوف لك التكروري منبطح بالسروال بس .. و ماسك البت من رقبته بايديهو الاتنين و البت تذافت و تفرفر ... و الام تجر في التكروري ما قدرت غلبه .. مشت شالت المبخر بنارو الملهلبي و قالت كدي كشحته في ضهر التكروري ... بلا نط و قام يكورك و يضغي و يتنفض و ينعل .. أها في الساعة ديك جا يوسف داخل و شايلو جريدي غليدي كدي .. و بقى يسعل في الحاصل شنو .. و كت شاف الام و التكروري يتناعلو و البت مطيري عيونه و جلابيته مشرطة .. قام نزل لك في التكروري ضرب .. عمري ماشفت يوسف هايج متل دا .. يضرب محل ما تجي في بطنو في راسو في ضهرو و الدموم ديل بقن يسون شووو ..الام ساقت بتها و جرن مرقن و أنا مرقت و إنضاريت ورا الباب و بقيت أعاين ... أها التكروري وكت الدنيا ضاقتبو إتمدد في الواطة و بقى يرفس و يشخر متل الخروف المضبوح .. أنا قت خلاس كتلو ..
فشان كدي يا بنيتي أعملي حسابك .

* و الله يا خالتي فد يوم مشيت مع أمي و دخلنا العوضه سوا .. أمي قالتلو البت دي دايراك تعزم لها فشان تلقاله جنا .. و كمان شوف لها شي لمخروقته موجعاها .
أها أداني زيت و كب فيهو رماد من المبخر و قال لي إتمسحيبو قبل الحمام كل صباح . أها المرة التاني أمي مشتلو براها و قالتلو الزيت ما نفع الوجع .. قال لها خليها تجي أوريها تمسحو كيفن .. أها تاني ما مشيت .

* كان شافك يوسف داخلي هناك قبل يطلقك يكسر لك كريعاتك .

* وووووب علي يا خالتي جسمي بقي كلو يضرب .. أمسكيني عليكي .

* قولي بسم الله ربنا مرقك و ستر حالك .. بسم الله بسم الله يا حافض يا حافض .
بس يا بنيتي نصيحتي ليكي تسوقي راجلك و تمشوا الخرتوم تقابلو الدكتور .. متل شاديه بت زينب عرسوها سبعه سنين ما ولدو .. مشو الخرتوم للدكتور .. بعد رجعو شهرين تلاتي بلا حملت و ولدت التيمان ديل يا حلاتن . أمشي أسعليها من إسم الدكتور و العلوان .

* نان هم ما قالو مشولن لدكتور .

* أنا قت لك مافي شيتن بيفوتني .. إنتي كلميها برااحة بتحن عليك و بتكتب لك العلوان .

* الرسول آخالتي شامة تاكلي لامن نكمله سوا ..

* الرسول عزيز كفاي شبع و الله قراصتك كيف سمحي ... نعمي دايمي .
أها إتأخرت بعد دا ماشي ناس فاطني بت علي ... ودعتك الله ما تنسي كلام الخرتوم كلمي راجلك برااحة و حنسي و رضي ... خلي يحن عليكي أصلن الرجال ديل متل الشفع .

[/size]


الخزين ود نصر
عضو

عدد المساهمات : 2
تاريخ التسجيل : 22/10/2015

الرجوع الى أعلى الصفحة اذهب الى الأسفل

رد: مختارات من حكايات الخالة شامة

مُساهمة من طرف أحمد حيدوب في الإثنين 10 أكتوبر 2016 - 9:51

أخونا وحبيبنا الخزين ودنصر

صبحك الله بالخير

ياخي لا زلنا بإنتظار باقي قصة الخالة شامة منذ شهر 12 سنة 2015
وفاتحين خشمنا
هههههههه

تحياتي لك ولكل شباب المنتدى





avatar
أحمد حيدوب
Admin

عدد المساهمات : 1624
تاريخ التسجيل : 06/04/2008
العمر : 49
الموقع : مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى