مكتبة الشاعر عمر الطيب الدوش

استعرض الموضوع السابق استعرض الموضوع التالي اذهب الى الأسفل

مكتبة الشاعر عمر الطيب الدوش

مُساهمة من طرف أحمد حيدوب في الثلاثاء 28 ديسمبر 2010 - 21:41


جزء من قصائد الشاعر الراحل المقيم / عمر الطيب الدوش

(العمدة جابر ود خف الفيل)

العُمْدَة جابِر
والصباح نَديان رطيب
في اِيدو كان مَاسْك الشروق
في جيبو كان طاوي الغروب
في كرْشُو قَاعِد منْبَسِط
في الكُرسي كان
مَاهِل خصيب
ما عُمْدَة يَاخْ
والفرَح أِْكَال يطِيب
الشَيَّهْ والجمر الشَّهي
الشِيشَهْ والشَّنَب المولِّع حُمَّى
قِفْ
العُمْدَة جابر - الكرسى طَقْطَق تِحْتُو-
مَدَّ ايدو على الأوامرِ
والأوامِر ما بتطْلَع بَسْ كلام
مِن جسمو بِتْنِز
مِن حَشَاهو
مِن صلَف مَعْمور وعامر
مِن قبور أجدادو تزحف
للأصاغِر ..والأكابِر
مِن منابِت شَعَرو تَطْلَع
مِن نهايات الأظافر
دَه الصباح
العُمدة جابِر
نَادَى صالِح وَدْ قِنِعْنَا
الله ..الله على الأوامِر:
إسْتَلِم يا وَدْ قِنعْنَا
تسْتَلِم أَمْر الأوائل
تَلْقَى طالِع للأواخِر
تَسْتَلِم أمْر اللِّى عايش
تلْقَى من أهل المقابِر
واوْعَىَ من فضلك تَغَالِط
دِى الأوامِر ودِى الدفاتِر
ودِى العساكِر
وافتَح السِّكهْ اليَمُر
سيدنا آمر ابن جابر
واسْتَلِم يا وَدْ قِنِعْنَا :
إنتَ عارِف بيت سُعاد
وعارف إنَّك من قَبيلَة
لا رأينَا ولا سِمِعنْا
ولا عِشمْنَا ولا طِمعْنَا
وانت مُرْسَال يا ..بَجَم
تدخل البيت زى كأنّك..
مارِق الآن من جهنم
ولمَّا تَطْلَع ليكْ سُعاد
كُون خفيف زي الأمل
ومرَّة أتْقَل زي جَبَل :
أوْعَىَ تَفْرَح أوْعَى تزْعَل
واقْصِر ايدك من سلام
خلّي نَظَركْ يِكُون كفيف
ومَشِيكْ يكون ناعم مُغرْبَل
ولما تَطْلع ليك سُعاد
زي حلم في توب رهيف
أدّيهَا ضَهَركْ يا مُغفّل
وبكُلِّ ما علّمْتُو ليكْ
من طاعَة من ذُّل من وجل
أمْرُق حشاي قِدَّامهْا يلْمَع بالوجع..
قُول ليهَا لمَّا الشوق يبين
ما بين ..شجيرات الأراك
والفرحَة تغْسِل طرْحتهْا
والبدر يمشى على الهلاك
والخوف يكون لسَّع جَنين
في رُكْنِ من ساحة الوَّلَه
في زاويَة من ساعة الحنين
ما بين دِى ارْضَك ودَاكْ سَمَاك
العُمْدة منْتظْرِك هِناك
ومِن هِناك درْبَك عديل
نادِى المُدرِّس وَدْ خَدوم
والمديرِس وَدْ خدوم
العُمْر مربوط بالجرَس
والصبْرِ مشْنوق الضُحى
والخوف نَزَل من غير حَرَس
والعُمْدة فوق كل الأصول
لمْلًم جِرايواتُو وجَلَس
عُمدة فوق كل الفصول
في التلاميذ في الطباشير
في التعابير في النَّفَس
يا طه يا
يا إنتَ يا يا ودْ خدوم
ملعون أوهو الكان ده يوم
الإنتَ عريان وقَّفَك
والعمدة قدَّامك رَفَس
وعليكَ إنتَ براك تخمّن
هل تكّلم أم تنَحْنَح أم عَطَس
والعُمدة قال:
يا إنت يا ..
يا طه يا
يا ودْ خدوم
أنا عندي إنتَ براكَ كوم والحِلَّة كوم..
يَاخ ديل بَقَر في أحْسن الأحوال غجَر.
أنْسَانى من كومَة هدوم
مشْرورَة في الطين والهموم
ما حاتَنْشَف حتى لو نِشِف البحر
والنساوين والغيوم
ما حاتَنْشَف ..ما حاتَنْضَف ما..
و العمدة فوق راسك هتف:
(مسئول كبير زاير البلَد
وانتَ يا طه العِماد..
إنتَ الفهَم إنتَ السنَد
لِمَّ الصغار
وزِّع عليُهم كلِّ واحد فَرْد ..فَرْد
الفرحَهْوافرُش سِكّتْهم مرات طراوَة و..
مرّة وَرْد
ولمَّا يهتفوا في الفصول
يحيا ويدوم عاش البطل
ما يكون هُتاف
من أىِّ فَم يطْلَع زَخم يطْلَع زبَد
تنْهدَّ حيشان البيوت
والفرحَة في أحسَن مزاج
لا تْخَلِّى دابَة..ولا تُرابَة ولا أحد
هل انتهى يا ربي زيَّاك العَمَد
يا ود خدوم
وانت سايس للعقول
دَه عليكَ إنت بَراك بعْرِف:
هل تقدّم أم تزحْزَح أم جَمَد
والمديرِس ودْ خدوم
مع إنّو في حلْقُو مو عَلّق
كُلَّ أجراس المدارِس
كلَّ صوت في الدنيا عابِس
بِرَجْفَة لصَقَت في سُنونو
كلُّ رجفات المساكين والعواجيز والعوانِس
صوت بيتْعرَى ويضِيع ويلمُّو صوت تَرْيان.
ولابِس..
وصرخْتَ يا طه وصرَخ
ضُل المشاوير في الأصيل
في الساحَة رفَعَت مُقْنَعهْا
الذِّلَة ... والصبر الطويل
رقَصَت مع الكلمات شُجون
وجَرَت ورا الأحرف خُيول :
"يا عُمْدة هوي"
حامت على الناس القَماري
وزّعَتْ سَعَف النخيل..
" يا عُمدهْ هوي"
مَشَت سحابَة
وجات ربابَة وزفَّة قامت
في الطبول
"!!يا عمدة هوي"
الغافي فارق غَمْدَتُو
والصاحي تَمْتَم في ذُهول
قام ودْ خدوم
"يا عُمْدة هوي"
يا عُمْدة بالله إخْتَشِي ..
للعوْرَة ما بِنْفَع هُتاف
للسوسَةْ ما بْفِيدَك حَشِى
علّمْتَنا الجري فوق جروحنا
وقلتَ : أبداً دَه المَشِي
خَتْيتْنَا في قلب المشاكل
وصِحنا كُلّنا
" مافى شِي كلمَهْ واحدَهْ
جناب سعادتَك
من ضمير ما مُرتَشِي
الحِلَّة يا .."
و العمدة ..أو سلطانو قام:
"الحِلَّة أيه..؟
حتَّة مُعلم مُبتدىء ..
الحِلَّة أيه
مسئول كبير زاير البلد
لا ودْ خَدوم ولا ألفِ شُوم
أو ألف بوم
حيَعَلِّم الوِّز كيف يعوم"
و العمدة جابِر..
دَه الصباح
مدَّ إيدو علي الدفاتر
وقبلما ما ينْصَر جبينو
كان شطب كلَّ المساخِر
اللِّي حاضِر من مساخِر
والمُسافِر
ما عدا السجن العُمومي



ما ضَلّمتْ

أقول
والشمِس في عِز الأمل
تهتَ ومَشيت
أقول يا نِحنَ يا إنتو
وبكيتْ
يا مواعيد ..
يا صباح من غير وسِم
تهتَ ومَشيتْ

ما بْتَعرِفْ الزول البِجِيك ..
ولا البِجيكَ بيَعرِفكْ

حتى الشبابيك
والزوايا الكان بِتَجْمَع
في حناياها الشكوك
ضَلّمتْ

أغشاكِ يا نفسي الغريبة
من همومي أطلـّعـِك
ألقاكِ واقفةْ علي الطريق
أحزان بتَفرح وتشتبِك
أفراح بتحزن وتِرتبِك
لمّنْ رحلتَ مع الغُنا
عـِز الأماني
وضَلّمتْ

مدّيت علي الأمل القريب
أشواق كَتيرة وقصّرتْ
في زاوية من ضُل الشجون
جابت ظنونا وقيّلت

كلّمتَ أشجار الخريف
عن شوق نما
في الوحشة والزمن الأسيف
دلّتني أفتّش في المغارب
وفي المشارق
عن علامات أو رصيف
تَرقُد الأزهار عليهو

يا بنفسج
كُحلي غالي
وبُرتقالي
أمشو إنتو ..
أنا البقيف

ما ضَلّمتْ ..



سحابات الهموم

سحابات الهموم .. ياليل
بكن بين السكات والقول
وباقات النجوم
الجّن ..
يعزن في المطر
فاتن عزاك .. رجعن
فاتن عزاك .. رجعن
وشوق رؤياك دوام مشدود
على أكتاف خيول... هجعن
وصوت ذكراك .. مكان يجرى
يلاقى السيل ...
وسر مدفون بصدر النيل
**********
ولولا الذكرى مافى أسف
ولا كان التجنى ... وقف
**********
وصوت ذكراك
رزاز صفق
على خطوات بنات .. سجعن
وصوت ذكراك ..
حنين لى غيبة في المجهول
ولولا الذكرى مافى ..وصول
ولولا الذكرى مافى .. إصول
ولولا الذكرى مافى شجن
********
سحابات الهموم ياليل
بكن



ضل الضحى

شمس المغرب الممحوق تميل فوق وشك المحروق
تبين صفرة سنيناتك
بين ضل الكلام مقلوب
تميل يا صالح الأيام ولا عاشرت هِدما زين
ولا حتيت تراب السوق .. تفضل
تفضل يا خفيف الضُل ورَشْ جرجيرك البايت
وعد ليمونك الفضَّل وكوم حزنك الباير
وبيع من غير تشاور زول تواريخ دمك الفاير
وتفرش في الضحى الأعلى تبيع سام العمر كيمان
ولا لافتات ولا أوزان ولا أتمان
تشِد تركب قفا الأيام
زهج خيلك يلد تيمان
فرس شوقك دوام مسبوق
تميل يا صالح الأحلام
أهو القدامك البتبيعو
أشواق الصبا الأيتام
وبرضك ما تبيع لي زول
أسف ربيتو على كتفك
ولا عشتا شبع أوهام
أهي الطاحونة يا صالح أهو السوق الصبح ألغام
تفضل يا خفيف الضل ورشرش صبرك الفاير
وارفع صوتك الحنضل وألعن وما يهمك زول
أبوك يا سوق سليل الغم
أبو الطورية والمنجل
وخال الرجلة ، عم الدنيا
جد الفجلة والفلفل وشكل القفة
والكرتونة والجردل
وألعن ما يفوتك زول
من الشارين من البايعين
وجنس البرضا والبزعل
واشتم ياخي إيه فضل
وإيه يحصل وهل تقبل
تميل يا صالح النجمات
مع القمر الخصي وأهبل
متين يا صالح الآمال
تميل ترقص وتتعدل ؟؟؟
واضحك لا يشيلك هم
على النيل الصبح مبهول
صحي الأمواج بتتبهدال
صحي الاحلام بتتبهدال
برضو سعاد حتتحول
لا ... لا يمكن
دي ما شمس الضحا الأعلى
ومشية حنينة تحت الضُل
وتكية ضرية فوق رملة
دي أحلام جارية متبهلة
وما ممكن تقيف إلا
وليد العمدة يلعب بي
يدردق في الحرير كرشو
يعاين في النعال وشو
ويقدل في الفريق تمساح
ينادى سعاد تلم الكون
تحت ضُل الضحى البواح
تصور يا خفيف الضُل
دا عندو الهمسة .. أمر مباح
وتقطع من لحمنا الحي
وتعقد فوق شحمنا الساح
ونهتف ونحنا مشويين ومقليين :
ده يا عمدتنا هو الصاح
وياهو الصاح
وياهو الصاح
ويا عزة نفس بركت متين بتسوي لينا جناح ؟
وأشيلك يا سعاد وامرق
من الزمن الدني ونباح .



طه المدرس ود خدوم

يا تلاميذي العُزاز
بسم الله
بسم المجد في أحضان سُعاد
اكتبوا التاريخ
خمستاشر ربيع أول
والمُوافِق
موِلد الايقاع على خطوات سُعاد
والمُرافِق للصباحات ، المناحات
واخضرار الغيم وفقدان الشُعاع
ارتفاع الموجة لي صدر الشراع
اكتبوا
ارتفاع الموج إلى صدر الشراع
يا تلاميذي العُزاز
خلِّي بينك وبين زميلك
زي مسافَهْ
قَدْر ايه؟
قَدْر المسافَة البين عيوني وبين سُعاد
قَدْرِ آلاف الفواجع في انهيارات الحصاد
قدْرِ مسحوق الأنين في تواريخ البُعاد
اكتبوا
ودَيَّه أيه يا اْستاذ يكون؟
دا المُجنن طه اسألوا ودْ سكِينَة
اسألوا الريح المسافر في تجاعيد السكينَة
شاوِرِوا الموج اللِّي ساكِن في مسافات السفينَة
تسألوني عن سُعاد
اكتبوا العنوان بخط ممشوق وواضح
احذروا اللحظ البيضحك وهو جارِح
مُرْكَب على الله ويلأّ نجتاز الحدود
اكتبوا العنوان بِخَط مستور وفاضح
رقصة الموج الأخيرَهْ جُموح نُهودِك يا سُعاد
عنوان طويل
يا تلاميذي العزاز
كِلمَة..كِلمَة على مهلْكُم واكتبوا
والصيف طويل لمْلَم العُشاق مواعين الرحيل
نجمَة شاردَة
وغيمَة هاجدَة
ضَمَّة ضَمَّة ضَموا شرف المستحيل
جَوهَرُوا الحزن الكحيل
مُركَب على الله ويلأّ نجتاز العويل
بانت سُعاد
غامت ملامح السكَّة وانكتم المكان
رَقَصتْ سُعاد
فى خانَة الأصفار وميلاد الزمان
جمّعتْ من كل زهرَة مواجع الحُب المُهان
مُركب على الله ويلأّ نجتاز الدّخان
يا تلاميذي العزاز
خلّوا بينكم وبين رنين الضحكة صرخَة
حُب مُهان والصبر أولىَ
خلُّوا بيني وبين جنون الخيبَة شَوْلَة
واكتبوا
عاشَ في زمن المذلًة المدعو طه ودْ خدوم
باع تفاصيل الكآبَة عشان يفرِّغ وتاني يمْلاَ
جاع وخيرِك يا سُعاد مرْدُوم رَدوم
عاش المدرِّس ود خدوم
كأنو نكْبَة كأنو شُوم
عاش المدرِّس ود خدوم
تسْقُط حكايات الهموم
الأزاهِر
والدفاتِر
والمتاجِر
والمقابِر
والخافر والمشاعر والنجوم
عاش المدرِّس ود خدوم
يا تلاميذي العُزاز
من كانَ حاضِر أو تَوَلَى
يقفِل الكرّاس ويلأّ
نشوف بداية المهزلَة
يا تلاميذي العُزاز
في صيف طويل مبطوح علي صدر الزمن
منظُلمَة الشوق ابتدا
فى حضرَة الحُب اندَفن
والنيل مدامِع للنجوم
والصبر مُفتاح للشجن
والحِلَّة مبتورَة وكسيحَة ومُهْملَة
بانت بداية المهزلًة
بانت سعاد بانت تفاصيل الشجون
والجنون والمقصلَة
بانت سُعاد
وقفتْ علي خِصر الجبل
فتَحت مشارع للظنون والأسئلَة
رقدَت علي شَعَر السهل
ضفَرت ملايين القُبل
(( والجو صفا والنيل هَدَا
وغاب الأتر ))
وأنا يا سُعاد
في الحِلَّة معجون من رماد من حسرَة
مقطوع من شَدَر
يا تلاميذي العُزاز
لا زوايَة لا قوس لا وتَر
وأنا يا سُعاد
فتّشتَ ساحات الأماني
ناصية ناصية
حجر حجر ، ما لقيتْ إلاّك زمن
مالقيت إلا بِلاد
وأنا يا سُعاد
يا شهوَة الحُب للعِناد
يا شهقَة الفرح المُعَاد
خلِّيني في بالك نغم

وأنا يا تلاميذي العُزاز
مخلوق بسيط من شوق وغَم
وأنا يا سُعاد مخلوق بسيط من شوق وغم

قامت سُعاد من رقدتهْا
الكون جميع كان انحصر ما بين
قيامَهْا ووقفتَهْا
النخلَة والهجليجَة والسيّالَة
والشوق والمطر
الغابَة والهم القديم
الفرحَة والذُّل والخطر
كلُّو انْجَمَع في كفّتهْا
قامت سُعاد من رقدتهْا
قامت قيامة العُمْدة مليون اتجاه
اشتَّتتْ كل الجموع
من كلِّ أنَّة وكلِّ آه
ومشيتْ عليكْ أنا يا سُعاد
حتَّة مُعلَّم مُبتدىء
غاوِي وبسيط
ولو ما خَدوم
كان من زمان محْسوب لقيط
ما آصلي مولود لللَقِيط
أو مُغفّل
أو مبهدَل
أو عبيط
يا زعيطاً يا معيط
ومشيت عليك أنا يا سُعاد
شُبّاك علي النار انفتَح
درويش نحيل
في صُرَّة شال حزنو وسَرَح
سيلاً تقيل
وسَّع خطاويهو وكَسَخ
ومشيت عليك أنا يا سُعاد
مربوطة عيني علي خُطاك
في عيونك اتجمّع كلام
في صوِتك اتجمّع ظلام
حسيتو في الحَشَا والعِظام
وقريتو في سعف النخيل
ولمحتو في طوق الحمام
في العفة والخُصْلة الحنِينَة
اللفْتة والتوب والحِزام
بارَت مواعيد الغرام
ونزرْتُو حُبِّك للزنازين
والمساجين والهوام
والعُمدة فوق راس الفرح
جمّع جريوْاتو ونبح
(مسئول كبير زاير البلد)
قُتْ ليهو يا عمدة اختشي
مسئولك الزاير الكبير
يا ريتو بس لو شاف سُعاد
كان رسم للعفَّة
أوصافا وتقاطيعا ومقاسا
كان دخل للحِلَة من بابا وشبابيكا وأساسا
كان اتْوَلد برَّهْ المُتاجرة
والمحاورَة والمصاهرَة والخساسَة
كان تاب
وباع للصدقِ مجدو وذمّتو
يمرُق جديد
من حَر دهاليز النِخاسَة
من هدومِك يا مرازِل
يا مزابِل
يا مباخر للتعاسَة
يا مناكر
يا عساكر
يا ، سُعاد
فِك علَي كلب الحراسَة
يا تلاميذي العُزاز
في يوم طويل مبطوح علي صدر الزمن
اتلمّت الحِلَة
الحنينْه عشان وداعَك يا غروب
حُزن فارس
وكيف يصير في لحظَة مولَى
كيف يجوز
يا عمدَة كيف ؟
الذُّل مُصان
والحّب مُهان
والسجن أولى ؟
كيف لقيت يا عُمدة كيف
للمجازر
والخنازير
والخناجر
في رموش الغيم مَحَلّة ؟
كيف بنيت يا عُمدة كيف
من رماد حزن المآتم
من تُراب غضب المآتم
ليكْ ولي ضيفَك مَظلَّة
حِلَّة حادَّة
وإنتَ تزْرع فوق ضُلوع الوادي حفْلَة ؟
كيف يجوز؟
قد يجوز وقد يجوز
يا تلاميذي العُزاز
ضَلّض مَن قَد لا يحوز
من تبتّلْ أو تيَمَمْ
أو تيتَم أو ترمّل
يا تلاميذي العُزاز
اكتبوا التاريخ
خمِستاشر سُعاد أوّل.



كلو شان البت .... سُعاد

كلو شان البت .... سُعاد
دقّتْ الدَلّوُكَهْ
قُلنا الدنيا ما زالت بخير
أهو ناس تعرِّس وتنْبَسِط
تكْكَّتَ سروالي الطويل
سويتْلُو رقعات في الوسط
في خشْمِ عضّيت القميص
أجري وازيّد شوق وانُط
لا مَن وصلتَ الحفلَة زاحمتَ الخلق
وركزْتَ
شان البِتْ سُعاد
أصلي عارف جِنَّها في زول بيرْكِز وينْسَتِر
لكنّي عارِف إنَّها
لو كلو زول في الحلة بالسُتْرَة إنجَلَد
ياني الآزاها وجِنَّها
برْضِي عارِف أظنَّهَا
دِيمة في صَرَّة وشيهَا
يلفحْني شوق نافِر لَبَد
وركزْتَ للحُرقَة المَشَت فوق الضلوع
تِحت الجِلد
ضمّيت قزازتي مرقتَ عِن طَرَف البلد
وسِكرْت جَدْ
وأنا جاييّ راجعِ مُنْتَهي لاقتْني هِي
قالت "تعال"
كِبْرَتْ كُراعي من الفرح
نُص في الأرِض نُص في النِّعال
اتْلخْبَط الشوق بالزَّعل
اتْحَاوروا الخوف والكلام
"ه-يْى يا سُعاد
علي ودْ سكينَة وكِلْتِي في خشمو الرماد
علي ود سكينَة ومَات أسى
وأنا بِت بلاك ملْعُون أبوي لو كنتَ أرْضَى أعرِّسهْا
وأنا يا سُعاد
وكتين تصُبي سحابَة تَنْزِلي زي دُعاش
بفْرِش علي روحي واجيكْ
زولاً هِلِك تعبان وطاش
وأنا يا سعاد وكتين أشوفِك ببقى زول
فَرَشولوا فَرْش الموت وعاش)
قالت سُعاد
(بطِّل كلام الجِرْسَة انجض يا ولد)
مزّقْت روحي نِتَف
مرّقْتَ من جيب القميص
عرقي وأسق
طبّيت قزازتي وصلتَ لي طَرَف البلد
وسكْرتَ جَد
اذّنت في الشوك والسَلَم
وسرحْتَ بالناس والغَنَم
وركعتَ للعرقي البِكِر
وقدتَ في الألم الحِكِر
وحلمتَ زي شالني ومشَى
فوف زحمة نْبيْ الله الخِضِر
صحَّاني صوت العمدة قال
(مسئول كبير زاير البلد)
قال لينا
(وكَتْ الزول يجِي ، لازِم تقيفوا صفوف صفوف
وتهيّجُوا الخَلا بالكفوف
وتقولوا عاش.. يحيا البطل)
صلّحْتَ طاقيتي الحرير
واتنَحْنَح الحشا بالكلام
ورميتُو من حلقي الوصَل
قُتْ ليهو يا عُمدهْ اختشي
مسئول كبير في الدنيا غير الله اِنْعَدَم
ما شُفْنا زول رضّع صغار
ما شفنا زول نجّح بَهَم
ما شفنا زول لمْلَم رِمَم
لا صِحِينَا عاجِبنا الصباح
لا نُمْنَا غطّانا العَشَم
والحِلَة من كلَّ الجِهات محروسَة
بالخوف والوهم
ومضينا من زمناً قديم "يا عُمدة" مرْسوم انتحار
الموت مُباح
والحب نِطاح
والصِدقِ من جِنس الزِّنا
العافية مولودَة سِفاح
والرغبَة مكسورةَ جناح
الحلم والوعد النبيل
الطِفلة والأم ، النخيل
الرّنَة في الوتر الأصيل
تلقاهَا في قاموس نكاح
يا يُمَّه واح.. يا حِلَّة واح
يا سعاد تعالي ولمّي من كل البيوت
عِدَّة السَفَر الطويل
زَخْرِفي الفجر النهار
شخْبِطي الضُحى والأًيل
المَغْرِب
الفجر
النجوم
في صُرَّة وارمِيها البحر
خلِّينَا فوق الشك نَعُوم
والعمدة فاض
العمدة صار مليون عُمَد
العمدة فيل
جبلاً تقيل
لبْوَة وأسد
حَسَنَة وغَصِب
جُمْعَة وأحَد
بقّيتْ قزازتي
مرقْتَ عِن طرف البلد
وسكْرتَ جَد
وأنا جايى راجِع أجهجهو
لاقاني هو
سايق العساكر والكلاب
رامي بين عيني وعينو
كلب وتَكْشيرة وحُراب
ضاقت نِعالي من الزّعل
من تحتهَا اتْمَلمل تُراب
الغيم سكب ضُلو ومشَى
والدنيا غيما سراب سراب
والحِلة زي بلداً بعيد
زوَّد بُعاد وقُرُب سُعاد
اتجمَعَت كلَّ البيوت في راحتَا
زي بِت لِعاب
مجنونَة تصرخ في الزوال
ممزوجَة في الدم واللُعاب
عينيَّ ضاقت نظْرَتهْا
والجوف يطقْطِق بالكلام
قُبَّال يقولوا لي سلام
اتلمُوا حولي بلا نِظام
شال وعِمَّة
توب وغُمَّة
فاس وطوريَّة وحزام
شالوني بي كُل إحترام
ورموني في قَعَر السجن
حصلّني قبل اليوم يِتم
جارنا المدرِّس ودْ خدوم
قال ليَّ
لا زول قام هتَف
لا كف مشَت بتلاقِي كَف
و العمدة زي هَمْبول وقف
يا صمت أُف
يا دنيا تُف
وأنا يا سُعاد للشوق نغَم

ــــــــــــــــــــــــــــــــ والبقية تأتي إن شاء الله ــــــــــــــــــــــــــــــــ






أحمد حيدوب
أحد مؤسسي المنتدى

عدد المساهمات: 1396
تاريخ التسجيل: 06/04/2008
العمر: 46
الموقع: مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: مكتبة الشاعر عمر الطيب الدوش

مُساهمة من طرف ابوهاله في الأحد 15 مايو 2011 - 19:22

الدوش ذلك المبدع عاش زاهدا ومضي وهو مرتاح البال والضمير شكرا ود حيدوب

ابوهاله
عضو جديد

عدد المساهمات: 2
تاريخ التسجيل: 14/05/2011

الرجوع الى أعلى الصفحة اذهب الى الأسفل

رد: مكتبة الشاعر عمر الطيب الدوش

مُساهمة من طرف سليمان أبوكنة في الإثنين 16 مايو 2011 - 13:17

الهم أرحم وأغفر للشاعر عمر الطيب الدوش وأسكنه فسيح جناتك

سليمان أبوكنة
الرتبة الذهبية

عدد المساهمات: 45
تاريخ التسجيل: 27/12/2010

الرجوع الى أعلى الصفحة اذهب الى الأسفل

رد: مكتبة الشاعر عمر الطيب الدوش

مُساهمة من طرف أحمد حيدوب في السبت 21 مايو 2011 - 19:50

مشكورين اخواني أبوهالة وسليمان أبوكنة
على المرور الجميل والحضور الدائم
الذي يضفي على منتدانا رونقاً وبهاءاً






أحمد حيدوب
أحد مؤسسي المنتدى

عدد المساهمات: 1396
تاريخ التسجيل: 06/04/2008
العمر: 46
الموقع: مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

رد: مكتبة الشاعر عمر الطيب الدوش

مُساهمة من طرف أحمد المبارك في الأربعاء 8 يونيو 2011 - 17:56

مشكور انت يا استاذ ود حيدوب الاستاذ ابن الاستاذ على لفتاتك الرائعة بتوثيق اعمال اصحابها افذاذ خلدوا بصمة على "الكلام" وتفاصيل "المعاني" .. ولا اعتقد انك مسبوق بشخص اخر في الاهتمام بهذه الامورمما يعني بصورة مباشرة تفرد منتدانا وسياتي اليوم ليشهد على ذلك الكثيرون بوقفتنا وتسندنا في رفعة هذا المنتدى "المتميز" اسما ومحتوى ....






أحمد المبارك
أحد مؤسسي المنتدى

عدد المساهمات: 405
تاريخ التسجيل: 24/02/2010
العمر: 28
الموقع: السعودية ـ مكة المكرمة

http://abudeleig.montadalhilal.com/

الرجوع الى أعلى الصفحة اذهب الى الأسفل

رد: مكتبة الشاعر عمر الطيب الدوش

مُساهمة من طرف أحمد حيدوب في الثلاثاء 12 يوليو 2011 - 20:18

نسأل الله ذلك يا دكتور
وأن نرى منتدانا هذا بين مصاف المنتديات الكبيرة
وعلى إيدك يا باشا وباقي العقد الفريد من أعضاء المنتدى






أحمد حيدوب
أحد مؤسسي المنتدى

عدد المساهمات: 1396
تاريخ التسجيل: 06/04/2008
العمر: 46
الموقع: مكة المكرمة ـ السعودية

http://abudeleig.montadalhilal.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


صلاحيات هذا المنتدى:
لاتستطيع الرد على المواضيع في هذا المنتدى